منتديات يوسف سات - معلومات قانونية مهمه جدا جدا:

السلام عليكم ورحمة الله وبركاته

تحياتي للجميع

خاي بالك المعلومات دي في بالك وانت بتكتب عقد سواء بيع او ايجار او مشاركة او اتفاق "

1-العقد مش حيكون باطل لو ما فيش شهود ماضين عليه المهم توقيع الشخص اللي حيبعلك مش الشهود .
2- العقد لازم فيه تاريخ ما ينفعش يكون فاضي وحضرتك تقولي نبقي نكتب التاريخ براحتنا .
3- ما فيش حاجه اسمها خالص الثمن حضرتك بتكتب في العقد ان ثمن الشي المبيع كذا وتم سداد كامل الثمن بمجلس العقد ما ينفعش تقولي اكتب خالص الثمن حضرتك مش بتشتري من كارفور ده عقد وله بنود وشروط .
4- يا ريت حضرتك لو مش حنتقل عليك سواء بائع او مشتري تمضي علي كل ورقة يا ريت ما تستسهلش وتكسل .
5- قولنا مليون مره في فرق بين صحة التوقيع والتسجيل في الشهر العقاري ومش معني ان العقد عليه ختم صحة توقيع يبقي اتسجل .
6- ما فيش حاجه اسمها تنازل علي ظهر العقد ويبقي كده اشتريت ...... اشتريت يعني اعمل عقد بيع وشراء .
7- يا ريت لما حضرتك تشتري شقة او تاجر تاخد اخر ايصالات مياة وكهرباء وغاز علشان لو المشتري باعلك مش حتشوف وشه تاني وغصب عنك حتدفعهم .
8- صحة التوقيع مهمه وبتثبت تاريخ البيع وتوقيع البائع والمشتري ماتعملش ناصح وتقول مالهاش لازمه علشان ماترجعش تعيط بعد كده وعلي فكره ينفع البائع يرفع صحة توقيع علي المشتري ما فيهاش حاجه كل واحد يضمن حقه .
9- لو حضرتك اشتريت شقه تمليك وما لكش اي حصه في الارض ةالبيت وقع كده حضرتك ما لكش اي حاجه يعني حضرتك اشتريت حيطان بس .
10 - لو اشتريت شقه من واحد والشخص ده اتوفي بعد ما بعلك من حقك صحة توقيع علي ورثته عادي .
11- عقد الايجار ممكن يتعمل عليه صحة توقيع او مدة الايجار اكثر من 9 سنوات ولو اقل من كده يبقي اثبات تاريخ .
12- يا ريت قبل ما تشتري شقه تسال هل صدر لها قرار تمكين ولا لا علشان لو زوجة البائع كانت عامله قرار تمكين للشقه قبل ما يبعها يبقي عليه العوض ومنه العوض .
13- يا ريت لما تشتري شقه ويكون عليها اقساط تعمل العقد من 3 نسخ نسخه للبائع ونسختين للمشتري علشان لما حضرتك ترفع صحة توقيع للعقد المحكمه لازم يكون قدامها اصل العقد وطبعا المحامي مش حيقدر يسحب الاصل غير لما القضيه تخلص ....
14- علي فكرة عادي جدا انك ترفع دعوي صحة توقيع علي عقد ابتدائي او عقد لسه عليه اقساط ..
#####من الاخر لازم يكون معاك او معاكي محامي فاهم للاطلاع علي الاوراق والتاكد من صحتها ثم صياغة بنود العقد بما يضمن كافة حقوقك #####

تحياتي للجميع